5. అష్టమీ చంద్ర విభ్రాజ దళికస్థల శోభితా ముఖచంద్ర కళంకాభ మృగనాభి విశేషకా

 

 అష్టమీ చంద్ర విభ్రాజ దళికస్థల శోభితా 
ముఖచంద్ర కళంకాభ మృగనాభి విశేషకా ॥ 5 ॥

15. అష్టమీచంద్రవిభ్రాజదళికస్థలశోభితా

స్పష్టంగా అమ్మవారి నుదురు కనిపిస్తోంది. 

ఆ నుదురు అందంగా అష్టమినాటి చంద్రుని వలే ఉన్నది. 

అష్టమి నాటి చంద్రుడు సరిగ్గా అర్ధ చంద్రుడు. చంద్రునివి షోడశ కళలు. 

ఆ  పదహారు కళల్లో అష్టమి మధ్యలోనిది. 

అష్టమి నాడు అది శుక్లాష్టమి అయినా, కృష్ణాష్టమి అయినా అర్ధచంద్రుడే కనిపిస్తాడు. 

అయితే, శుక్లాష్టమి చంద్రుడు కృష్ణాష్టమి నాడు కనపడడు. అప్పుడు కనిపించే అర్ధభాగం వేరు. 

అలాగే,  కృష్ణాష్టమి చంద్రుడు శుక్లాష్టమి నాడు కనపడడు. ఇప్పుడు కనిపించే అర్ధభాగం వేరు.

ఒకసారి ఒక అర్ధభాగం కనిపిస్తే, ఇంకోసారి ఇంకో అర్ధభాగం కనిపిస్తుంది. 

మిగిలిన అర్ధభాగం చీకటిగా వున్నా, శ్రద్ధగా చూస్తే అందులోనూ చంద్రుడు కనపడతాడు. 

మనకి  దృక్కు ఉండాలే గానీ, అన్నిరోజులూ షోడశకళలు చూడవచ్చు. 

అలా ఆ అదృశ్యంగా వున్న భాగాన్ని కూడా దృశ్యంగా దర్శించగలగటం ఒక దివ్యానుభూతి. 

ఈ అష్టమి చంద్రుడే అర్ధనారీశ్వర తత్వానికి ప్రత్యక్ష ఉదాహరణ. 

శివుడు, శక్తి ఇద్దరూ కలిస్తేనే సంపూర్ణం. 

దృశ్య, అదృశ్య చంద్రులిద్దరినీ కలిపితేనే పూర్ణచంద్ర దర్శనం.  

అష్టమి చంద్రుడిలో పూర్ణ చంద్రుణ్ణి దర్శించుకోవటమే అసలైన దర్శనం. 

అమ్మవారి శోభస్కరమైన అళికము, లలాటము ఆ అష్టమి చంద్రుడిలా వెలిగిపోతోంది.  

అష్టమి చంద్రుడు వంటి శోభస్కరమైన అళికము గల, 

ఆ అష్టమీచంద్రవిభ్రాజదళికస్థలశోభిత కు వందనం. 

ఓం శ్రీ అష్టమీచంద్రవిభ్రాజదళికస్థలశోభితాయై నమః 

16. ముఖచంద్రకళంకాభమృగనాభివిశేషకా

 అమ్మవారి ముఖం అష్టమి చంద్రునిలా వెలిగిపోతోంది కదా. 

చంద్రునికి మచ్చ, కళంకం, వున్నట్టే అమ్మవారికి కూడా ఒక మచ్చ వున్నదిట. 

ఆ మచ్చ ఏమిటీ అంటే, అమ్మవారి నుదుటను వున్న తిలకం. 

అది మృగనాభీ విశేషమైన కస్తూరీ తిలకం. 

కస్తూరి మృగం నాభి వద్ద ఏర్పడే ఒక తిత్తి నుంచి వెలువడే పదార్థమే ఈ కస్తూరి. 

పరిమళాలను వెదజల్లే ఈ కస్తూరినే అమ్మవారు తిలకంగా ధరించి ఉన్నది. 

అమ్మవారి ముఖ చంద్ర మండలానికి అందాన్ని చేకూర్చే కస్తూరిని ఇవ్వగలిగే 

ఆ కస్తూరి మృగం ఎంత పుణ్యం చేసుకుందో కదా. 

అమ్మవారి నుదుటన ఈ కస్తూరీ తిలకం చంద్రునిలో మచ్చ వలే ఉన్నదిట.

చంద్రునికి మచ్చ ఎంత అందమో, అమ్మవారికి కస్తూరీ తిలకం అంత అందం.   

మృగనాభీ విశేషమైన కస్తూరీతిలకాన్ని చంద్రునిపై కళంకం వలే ధరించిన,  

ఆ ముఖచంద్రకళంకాభమృగనాభివిశేషక కు వందనం. 

ఓం శ్రీ ముఖచంద్రకళంకాభమృగనాభివిశేషకాయై నమః 

------------భట్టిప్రోలు విజయలక్ష్మి

9885010650