6. వదనస్మర మాంగల్య గృహతోరణ చిల్లికా వక్త్రలక్ష్మీ పరీవాహ చలన్మీనాభ లోచనా

 

వదనస్మర మాంగల్య గృహతోరణ చిల్లికా 
వక్త్రలక్ష్మీ పరీవాహ చలన్మీనాభ లోచనా ॥ 6 ॥


17. వదనస్మరమాంగల్యగృహతోరణచిల్లికా

అమ్మవారి వదనము స్మరుని యొక్క మంగళకరమైన గృహము లాగా వున్నది. 

స్మరుడంటే మన్మధుడు. అంతేకాదు, మన్మధుని ఇంటి వలే ఉన్న అమ్మవారి వదనంలో 

ఆమె కనుబొమ్మలు ఆ మంగళగృహానికి కట్టిన తోరణాల వలే ఉన్నాయి. 

చిల్లికా అంటే కనుబొమలు. మన్మధుని మంగళమయమైన గృహమునకు 

కట్టిన తోరణమే అమ్మవారి కనుబొమ్మలు. 

చక్కగా మన్మధుని గృహమును పోలిన ముఖము,  

అట్టి మంగళకరమైన గృహమునకు కట్టిన తోరణములుగా  ఆ కనుబొమ్మలు.  

ఎంత అందమైన, అద్భుతమైన పోలిక. 

మన్మధుడే అందానికి మారుపేరు. ఆ స్మరుని నివాసము ఇంకెంత అందంగా ఉండి ఉంటుంది. 

అటువంటి ఇంటికి తోరణాలు కడితే, అది ఇంకెంత శోభాయమానంగా ఉంటుంది. 

అన్నింటినీ మించి ఆ తోరణాలు అమ్మ కనుబొమ్మలే అయితే, ఇక వర్ణనాతీతం. 

తోరణాలు ఇంటికి శుభప్రదం, మంగళకరం. ఇంటిని రక్షించేవి తోరణాలు. 

అమ్మవారు తన కనుబొమ్మలనే తోరణాలతో మన గృహాలను రక్షిస్తూ, 

వాటిని మంగళకరం చేస్తూ ఉన్నది. 

మన్మధుని మంగళ గృహము వంటి వదనంలో, తన కనుబొమ్మలనే 

తోరణములుగా తీర్చిదిద్దిన, ఆ వదనస్మరమాంగల్యగృహతోరణచిల్లిక కు వందనం. 
    
ఓం శ్రీ వదనస్మరమాంగల్యగృహతోరణచిల్లికాయై నమః 


18. వక్త్రలక్ష్మీపరీవాహచలన్మీనాభలోచనా

ఈ నామం మరింత రుచి. వక్త్రము అంటే వదనము. పరీవాహము అంటే ప్రవాహం. 

అమ్మవారి ముఖమే లక్ష్మీప్రదం. ఆ ముఖమే ఒక మహా ప్రవాహమైతే,

మహా వేగంగా ప్రవహిస్తున్న ఆ ఝరిలో, మరింత  వేగంగా చలించే మీనాలే ఆమె కళ్ళైతే, 

ఆ దృశ్యం ఎంత నయన మనోహరంగా ఉంటుంది. 

ముఖమా, అది అతి వేగంగా ప్రవహిస్తున్న ఓ చైతన్య స్రవంతి. 

అమ్మ కన్నులా, ఆ మహా ప్రవాహంలో జలజల పరుగెడుతున్న చేపలు. 

చేప తన సంతానాన్ని కేవలం తన  చూపు తోనే పెంచుతుంది. 

చేప పిల్లలు పెరగటానికి, ఆ తల్లి చేప చూపు చాలు. 

ఇక్కడ అమ్మవారిని  మీనాభలోచనా అనడంతో, 

అమ్మవారి కడగంటి చూపు చాలు, మన పోషణ, రక్షణ జరగడానికి అన్న భావం.

ఆ చూపు చాలు మనలను ఉద్ధరించడానికి. మనలని సంరక్షించడానికి. 

అందుకే మహానుభావుల దగ్గరకు, ఉపాసకుల దగ్గరకు, సిద్ధుల దగ్గరకు వెళ్ళినపుడు,

వారి కృపాకటాక్షము చాలు, మనం ఉద్ధరింపబడటానికి. 

అమ్మ కరుణామయి కదా, ఈ సమస్త సృష్టిని తన కన్నులతో చూస్తూ పోషిస్తూ ఉంటుంది. 

లక్ష్మి వంటి ముఖ మహా ప్రవాహములో చలిస్తున్న మీనముల వంటి 

కన్నులు కల, ఆ వక్త్రలక్ష్మీపరీవాహచలన్మీనాభలోచన కు వందనం. 

ఓం శ్రీ వక్త్రలక్ష్మీపరీవాహచలన్మీనాభలోచనాయై నమః 




------------భట్టిప్రోలు విజయలక్ష్మి

9885010650


కామెంట్‌లు

కామెంట్‌ను పోస్ట్ చేయండి

ఈ బ్లాగ్ నుండి ప్రసిద్ధ పోస్ట్‌లు

మా అమ్మ

మా అమ్మ  భట్టిప్రోలు విజయలక్ష్మి                           చాలా రోజుల తర్వాత ఏదో రాద్దామని కూర్చున్నా .  ఇది రాయటానికి అమ్మ   తరఫున   నండూరి వారి   విశేషాలు  రాయాల్సిన అవసరం పడటం కూడా   ఒక   కారణం .  హరి   అడిగినందువల్లా ,  పార్థు మామయ్యతో  మాట్లాడిన తర్వాతా ,  ఎన్నాళ్ళ నుంచో   నా వెంట పడుతున్న   మా   కాత్యాయనీ  మేడమ్ వ ల్లా , సావిత్రీ  ఆంటీ పుస్తకం చూసాకా , శ్రీదేవి పిన్ని పుస్తకం చదివాకా , నాకే ఇక రాయక తప్పదూ  అనిపించీ , మొదలు పెడుతున్న నా జ్ఞాపకాల దొంతర .                                                          ముందుగా మా అమ్మ గురించి, ఎందుకంటే ఈ బ్లాగ్, ఈ రాత కి కారణం అమ్మ కాబట్టి.  అమ్మ, నందివాడ లీలా కుమారి, పెళ్లి కాక ముందు నండూరి లీలా కుమారి. కానీ ఆవిడక...
మరింత చదవండి

99. పాయసాన్నప్రియా, త్వక్స్థా, పశులోక భయంకరీ అమృతాది మహాశక్తి సంవృతా, డాకినీశ్వరీ

చిత్రం
    పాయసాన్నప్రియా, త్వక్స్థా, పశులోక భయంకరీ  అమృతాది మహాశక్తి సంవృతా, డాకినీశ్వరీ ॥ 99 ॥ 480.  పాయసాన్నప్రియా ఈ నామంలో విశుద్ధి చక్రనిలయకు ఇష్టమైన పదార్ధం ఏమిటో చెప్పకుందాం.  పాయసాన్నప్రియా అనే నామం, అమ్మవారికి పాయసాన్నమంటే ఇష్టమని చెప్తున్నది.  పయః అంటే పాలు. పాలు, బియ్యం, బెల్లం వేసి వండిన పాయసాన్నమంటే కంఠకూపంలో  వున్న,  విశుద్ధి చక్రనిలయకు ఎంతో ఇష్టం. అమ్మను తృప్తి పరచటం భక్తులకు ఇష్టం.  అందరికీ అంతే కదా, గొంతులో నుంచి మధురమైన పాయసం  లోపలకు దిగుతుంటే హాయిగా అనిపించదూ. మన కంఠకూపంలో వున్న ఆ  విశుద్ధి చక్రనిలయకు కూడా పాయసాన్నమే ఇష్టం.    పాలు, బెల్లం వేసి వండిన తియ్యని పాయసాన్నాన్ని ప్రియంగా స్వీకరిస్తున్న,  ఆ  పాయసాన్నప్రియ  కు   వందనం.  ఓం శ్రీ   పాయసాన్నప్రియాయై   నమః    481.  త్వక్స్థా విశుద్ధి చక్రనిలయ తన నాలుగు చేతులలో ఒక దానిలో చర్మాన్ని ధరించి వున్నదని చెప్పుకున్నాం కదా. అదే ఈ నామానికి అర్ధం. త్వగింద్రియం అంటే చర్మము.  త్వక్ అంటే ...
మరింత చదవండి